SONAKAY

Uztailak 30 / 19:00 / Lekua: Zezen plaza

 

 

2018an Sonakay Denontzat diskoarekin debutatu ondoren, disko berria besapean dutela itzuli dira gipuzkoarrak: Sonakay Guztiekin. Izenburua, hain zuzen ere, album honetan aurkituko dugunaren isla da, proiektu berezi hau adiskidetasunaren eta artearen emaitza da, 11 abestietatik 8tan parte hartu duten 14 artista handi eta Sonakay elkartu dituena.

Egun hunkigarriak izan dituzte, eta horren emaitza dira, besteak beste, Se dejaba llevar por ti singlea, Ketamarekin ondua, «bete egin den amets bat» euskaldunentzat; Leonard Cohenen Oye, esta no es manera de decir adiós abestia, María Berasarteren ahots goxoarekin eta Iñaki Salvador pianistaren estilo bereizgarriarekin; doinu lantindarrak dituen Rumba txikitita, Yoni Camachok konposatua eta Omar González kubatarrarekin interpretatua, eta Izarrak abestia, Iker Laurobaren hitzekin eta berarekin batera interpretatua, ukitu magikoa ematen diona entzuteko irrikaz geunden disko honi.

Baina, singleez gain, disko honek benetako harribitxiak ditu, hala nola Agur Euskal Herriari, gure herriko ereserkia, abestiaren egile Urkorekin batera interpretatua. Yoni Camachoren hitzetan, gure musikaren «legenda bat» da, eta, aldi berean, «familiako bat». José de Pasaia taldeko ohiko konpositoreak ere disko honetan parte hartu du: Viejo castillo abestiaren egilea da, eta Tú siempre mientes kantaren interpretea. Soinu oso berezi batekin, flamenkoen azken zuzenekoetan ohikoa den abesti garrantzitsuenetako bat hasten da, La Tinta, Golden Apple Quartet taldearen ahots imitaezinekin. Gipuzkoarrentzat, «klase magistrala» izan zen laukotearen parte-hartzea. Kolaboratzaileen zerrenda Paco Suárezekin ixten da; Europako Orkestra Sinfoniko Erromaniaren zuzendariak Yoni Camachoren El sueño abestia orkestratzen du.

Pieza horiei beste bi gehitu behar zaizkie, Sonakayk folklorearekin eta, bereziki, euskal kulturarekin duen lotura estua azpimarratzen dutenak: Xalbadorren heriotzean eta Utrerako espetxea. Bi harribitxi horiekin, agerian uzten dute euskal- flamenko fusioan parekorik ez dutela, eta euskarazko flamenkoa gure herriko musikaren generoen multzoan sartu dela.